Dy ditë pushim, për të rikuperuar sa më shumë të jetë e mundur forcat, përpara atyre që konsiderohen si fazat më të ethshme të kampionatit botëror të Rusisë.

Në garë për trofeun më të lakmueshëm për kombëtare kanë mbetur vetëm 8 pretendentë, të cilët mes së premtes dhe së shtunës do të sfidohen mes tyre për çerekfinalet e turneut “Rusi 2018”.

E nëse është thuajse e pamundur të parashikosh se cila mes Brazilit, Francës, Belgjikës apo Uruguajit do të mund t’ia dalë mbanë të shkojë deri në finale, pak më i lehtë bëhet diskutimi nëse e themi në një mënyrë më të thjeshtë nga ana tjetër,

se njëra mes Rusisë, Kroacisë, Anglisë dhe Suedisë do të jetë padyshim në finale. Sido që të shkojë, surpriza është e garantuar.

Çerekfinalja e parë është ajo që do të luhet të premten, në orën 16:00, në stadiumin e Nizhny Novgorod. “Gjelat” e Francës janë bërë “me krahë” pas fitores ndaj Argjentinës dhe performancës së denjë për “Top të Artë” nga ylli 19-vjeçar i tyre, Mbappe.

Përballë tyre do të kenë Uruguajin, që ndryshe nga arritjet e deritanishme, duket se nuk do të ketë në dispozicion Edinson Cavanin, pas dëmtimit të pësuar ndaj Portugalisë.

Në mbrëmje, e gjithë vëmendja e botës do të jetë e fokusuar te supersfida që do të luhet në Kazan. Brazili dhe Belgjika, në letër mund të konsiderohen si skuadrat me më shumë talent në përbërjen e tyre, pa harruar këtu edhe Kroacinë.

“Seleçao” nuk pëson gol që nga ndeshja e parë kundër Zvicrës, ndërkohë që Neymar, edhe pse vjen nga një periudhë e gjatë dëmtimi, po shfaq “shkëndijat” e tij, edhe pse së fundi ka rënë prè e kritikave për një reagim të ekzagjeruar.

Ndërkohë, belgët e drejtuar nga Martinez vijnë nga një situatë tejet e komplikuar, teksa përmbysën disavantazhin e dy golave me Japoninë, duke shfaqur kështu një shpirt skuadre dhe një kompaktësi thuajse të pavërejtur më parë.

E shtuna do t’u lërë radhën dy sfidave të tjera. Në orën 16:00, Anglia, që vjen e frekët nga suksesi historik ndaj Kolumbisë përmes 11-metërshave, do të japë gjithçka mundet me objektivin madhor “ta rikthejnë në shtëpi trofeun prestigjioz”.

Por, sfida që do të luhet në Samara do të jetë ndaj Suedisë, me nordikët që në mungesë të Ibrahimoviç kanë treguar një lojë grupi të jashtëzakonshme, duke pësuar vetëm dy gola nga Gjermania.

Ky ndoshta është rasti i tyre i artë, duke parë se në rrugëtimin e tyre kanë bërë mënjanë emra të mëdhenj si Holanda, Italia, Gjermania…

Turi i çerekfinaleve do të mbyllet me sfidën e të zotëve të shtëpisë ndaj ballkanasve kroatë. Dy kombëtare këto, të cilat kanë arritur deri në këtë fazë pas kohëve shtesë dhe goditjes së penalltive.

Rusi-Kroaci do të luhet në Sochi, duke nisur nga ora 20:00. Organizatorët, pasi dërguan në shtëpi Spanjën, duan të përsërisin atë performancë solide dhe kompakte edhe ndaj një ekipi po aq të talentuar, por që ndaj Danimarkës nuk arriti dot të shfaqte forcën reale.