Detaje të reja vijnë nga Shkodra, ku vijojnë hetimet për vrasjen e dyfishtë që tronditi Shkodrën.

Burime nga grupi hetimor bëjnë me dije se personi i cili ka qëlluar në drejtim të çiftit të bashkëjetuesve, nuk ka pasur maskë në fytyrë, është afruar pranë automjetit të çiftit Berçana, dhe ka shkrehur karikatorin me 23 fishekë në drejtim të tyre.

Gjithashtu, thonë burimet, autori i cili ende nuk është identifikuar, ka mbërritur me mjetin tip “Mercedez Benz”, në lagjen Naim Gjylbegu në Shkoder.

Më pas, mjeti është parkuar jashtë rrugicës ku jetonte me qira çifti i bashkëjetuesve dhe ka marrë armën në makinë dhe iu është drejtuar të dy viktimave, nga xhami i shoferit dhe ka qëlluar në drejtim të tyre.

Dyshohet se ngjarja ka ndodhur në pak sekonda, dhe se autori është siguruar që çifti ka vdekur, ka parë fëmijën në makinë dhe është larguar sërish andej nga ka ardhur,

duke hipur në automjetin që po e priste dhe bashkë me drejtuesin e mjetit janë larguar drejt lagjes Kiras, ku mësohet se u braktis dhe makina, për t’ju vënë flaka pranë rrugës nacionale Shkodër-Koplik.

Policia e Shkodrës ka sekuestruar kamerat e sigurisë të një subjekti privat pranë banesës së çiftit, ndërkohë që materiali filmik është dërguar në Tiranë ku priten të zbulohen të dhëna lidhur me identitetin e autorit, mbi të cilin deri tani nuk ka asnjë të dhënë.

Boran Bërçana dhe Silvi Ndoci u vranë mëngjesin e djeshëm me 23 plumba, në një tunel afër pallatit të tyre në Shkodër.

Çifti kishte darkuar dhe ngjarja ka ndodhur kur ata po parkonin në makinën e tyre. Çifti kishte me vete edhe fëmijën 2 vjeç që fatmirësisht shpëtoi pa lëndime.