Ligji për teatrin e ri do të amendohet duke i dhënë mundësi dhe kompanive të tjera të hyjnë në garën për të marrë këtë koncesion.

Në përgjigjen e ardhur për këtë çështje, KE shkruan se mirëpret vendosmërinë e autoriteteve shqiptare për të amenduar ligjin e posaçëm për ndërtimin e Teatrit Kombëtar.
Në një letër drejtuar Sekretarit të Përgjithshëm të Këshillit të Ministrave, Ëngjëll Agaçi, vihet theksi tek ana pozitive e hapjes së thirrjeve për të gjitha kompanitë private të interesuara për të paraqitur projektet e tyre mbi këtë iniciativë.

Komisioni vlerëson se deri në këtë pikë nuk është shkelur asnjë parim i Marrëveshjes së Stabilizim Asociimit, por duke marrë parasysh shqetësimet e ngritura për mungesë konkurence dhe një tenderi të hapur, kërkohet që në vazhdimësi të respektohen parimet dhe principet themelore europiane.

“Ligji Special, sikurse u adoptua, parashikon paracaktimin e një kontraktori pa tender të hapur, duke ngritur shqetësime sa i përket respektimin të parimit të mos-diskriminimit dhe parimeve të tjera të prokurimit publik të BE-së, trajtimit të barabartë dhe konkurencës së hapur.

Prandaj, edhe pse deri në këtë fazë nuk është konstatuar asnjë shkelje ndaj Marrëveshjes së Stabilizim Asociimit, Komisioni vijon të inkurajojë autoritetet shqitpare që të vazhdojnë më tej bazuar në parimet e prokurimit publik të BE-së si dhe të sigurojnë një akses jo-diskriminues për tregun.

Në respekt të kësaj, Komisioni mirëpret qëndrimin e autoriteteve shqitpare për të amenduar Ligjin Special, për të prezantuar një thirrje të hapur mbi zbatimin e projektit zhvillimit të Teatrit Kombëtar, ku çdo kompani private të ketë mundësi të bëjë një propozim për projektin” thuhet në letrën që mban datën 7 shtator 2018.

Më tej, Komisioni nënvizon rëndësinë e përcaktimit të kritereve të qarta, transparente dhe jo-diskriminuese për përzgjedhjen që do të bëhet në zbatimin e Ligjit për Teatrin.
Gjithashtu, ekzekutivi i BE-së mbetet në dispozicion të autoriteteve shqitpare për të bërë qartësime të tjera si dhe për të udhëzuar në këtë aspekt.

Komisioni Europian u vu në lëvizje për këtë çështje mbi bazën e një ankese që bëri kryetarja e Komisionit të medias dhe deputetja e PD-së, Albana Vokshi dhe në bazë të një angazhimi në bazë të angazhimit të ambasadores së BE-së Romana Vlahutin e cila u takua disa herë me artistë që e kundërshtuan ndërtimin e një teatri të ri.

Disa ditë më parë kreu i Bashkisë Erion Veliaj kishte lënë të kuptohej se po diskutohej për hartimin e një drafti të ri. Shumica në pushtet shtyu me një javë diskutimin e dekretit të presidentit në pritje të përgjigjes së KE-së për këtë çështje.