Më 27 janar 2004, tre të burgosur kishin arritur të arratiseshin nga burgu Bostadel në Menzigen të Kantonit Zug.

Ata, në një aksion spektakolar kanë prerë grilat e dritareve të një mbindërtimi në kulm të burgut dhe ia kanë dalë të ikin përmes një kantieri ndërtimi, te lidhur me kabllo të rrymës elektrike.

Një ndihmës i tyre nga jashtë e kishte përforcuar kabllin në degët e një peme, ashtu që të tre të burgosurit të mund të kalonin në liri, pasi të ishin ngjitur në një lartësi prej 30 metrash, transmeton albinfo.ch. Njëri prej tyre ishte Ibrahim G., sot 42 vjeç, i cili jetonte në Lucern dhe për 15 vite pas ikjes nga burgu ka jetuar i lirë.

Pas kësaj ikjeje, kanë kaluar dhjetë vite pa asnjë shenjë të dy të ikurve (i treti ishte kapur shpejt në Zyrih). Por heshtjen e kishte ndërprerë shqiptari nga Kosova, Ibrahim G.

Ai, në vitin 2014 u kishte shkruar një letër nga Kosova, përgjegjësve për burgjet në Kantonin e Lucernit, por nuk kishte dhënë shënime për vendqëndrimin e tij. Aty ai kishte përshkruar rrethanat në vuajtjen e dënimit në burgun Bostadel.

Pesë vite më vonë, Ibrahim G. është ndaluar pasi kishte kaluar15 vite në arrati. Kjo ka ndodhur para dy javësh, në Aeroportin e Dyseldorfit, në Gjermani. Kështu, nga tre të ikurit tani vetëm njëri është ende në arrati.
Se si ka ndodhur saktësisht arrestimi, përgjegjësit e sektorit të burgjeve të Kantonit të Lucernit nuk kanë njohuri.

Ata vetëm konfirmojnë se personi i kërkuar është arrestuar në Aeroportin e Dyseldorfit dhe tani ndodhet në Gjemrani. “Zyra Federale për Derejtësi do të kërkojë ekstradimin e tij” thotë një përgjegjës i sektorit në fjalë.

Së bashku me kosovarin Ibrahim G. Ishin arratisur edhe Marko L.. me prejardhje nga Serbia dhe një person me prejardhje kroate. Kroati ishte arrestuar në Zyrih, pak kohë pas arratisjes, përcjell albinfo.ch kurse serbi Marko L., 38 vjeç sot, vazhdon të jetë në arrati.

Ibrahim G. dhe Marko L. kanë qenë nga 27 dhe 23 vjeç në kohën kur kanë ikur nga burgu. Ata po vuanin dënimin për drogë prej afër 6 vitesh në burgun e Mezingenit. Është e habitshme se si kishin vendosur të arratiseshin edhe pse u kishte mbetur vetëm edhe një vit për të mbaruar vuajtjen e dënimit.