Kriza në Maqedoni, gazeta gjermane krahason Ivanovin me Millosheviçin

Presidenti i Maqedonisë, George Ivanov, me refuzimin që të pranojë rezultatet e zgjedhjeve dhe dhënien e mandatit liderit opozitar, po bën atë që në rajon nuk ka ndodhur që nga rënia e Sllobodan Millosheviçit. Kështu shkruan gazeta gjermane “Frankfurter Allgemeine Zeitung” (FAZ). “Nuk është kurrfarë lajmi që sundimi i ligjit dhe ndarja e pushtetit nuk funksionojnë mirë në vendet e Ballkanit. Por, ajo që po ndodh në këto momente në Maqedoni, në rajon nuk ka ndodhur që nga rënia e Sllobodan Millosheviqit në vitin 2000: që shefi i një shteti hapur të refuzojë të pranojë rezultatet zgjedhore”, shkruan gazeta gjermane. Në tekstin me titull “Në konfuzionin e Shkupit”, “Frankfurter Allgemeine Zeitung” shkruan se Ivanov është president i Maqedonisë që nga viti 2009, kur ishte zgjedhur me mbështetjen e madhe të kryeministrit të atëhershëm Nikola Gruevski dhe partisë së tij së djathtë popullsitë VMRO-DPMNE. Ndryshe, presidenti i Maqedonisë, George Ivanov sot sërish ka hedhur poshtë mundësinë që t’i japë mandatin liderit opozitar Zoran Zaev nga LSDM. Ivanov që nga 1 marsi ka refuzuar t’i ndajë mandatin Zaev, duke theksuar se ai ka pranuar platformën shqiptare, e cila sipas mendimit të tij sjell në pyetje interesat themelore shtetërore të Maqedonisë. Njëkohësisht, në Shkup dhe qytete tjera po mbahen protesta në organizim të Iniciativës qytetare “Për Maqedoninë e bashkuara”, në të cilat kërkohet të hedhet poshtë platforma shqiptare. Protestat filluan me ftesë të Gruevskit për qytetarët që të “mbrohet shteti”, një ditë pasi që konkurrenti kryesor i tij politik Zaev bëri të ditur se ka shumicën parlamentare, pasi më herët lideri i VMRO-së dështoi ta bëjë një gjë të tillë me partnerin e tij të koalicionit të deri vonshëm, partinë shqiptare BDI.