Qendra “Memo” zgjodhi që ta përkujtojë 14 janarin e vitit 1990 në sheshin kryesor të qytetit. Një grup i aktivistëve dhe organizatorëve u mblodhën ashtu si para 30 viteve përpara bustit të Luigj Gurakuqit që asokohe ndodhej busti i Stalinit. Një nga organizatorët e aktivitetit Gjon Radovani tha se arsyeja e këtij aktiviteti në këtë 30 vjetor është që asnjë parti politike të mos e shfrytëzojë politikisht 14 janarit siç ka ndodhur deri më tani.
Disa prej aktivistëve që morën pjesë në demonstratën e heshtur 30 vite më parë shprehen se ata dolën nga shtëpitë duke e ditur se mund edhe të mos ktheheshin më të gjallë ndërsa tregojnë edhe zhgënjimet me Partinë Demokratike.
Sigurimi i shtetit i asokohe në 14 janar 1990 instaloi snajperat në pallate afër demonstratës e po ashtu kishte bërë gati dhjetra forca policie duke qenë gati për një përplasje gjakatare në rast se do të rrëzohej busti i Stalinit. Pavarësisht se ai bust nuk u rrëzua për herë të parë Shkodranët mposhtën frikën për t’i dhënë udhë shumë lëvizjeve të tjera që pasuan në Shkodër dhe më pas gjithë Shqipërinë.