Presidenti Ilir Meta ka uruar, Milo Gjukanoviç, për zgjedhjen si President i Malit të Zi.

Kreu i Shtetit shqiptar nënvizon se fitorja e Gjukanoviç ishte një mbështetje e qartë për konsolidimin e orientimit euroatlantik dhe evropian të vendit, si dhe garanci për forcimin e mëtejshëm të paqes dhe bashkëpunimit rajonal.

Presidenti Meta e kishte shprehur qartazi mbështetjen ndaj politikanit proeuropian duke apeluar shqiptarët e Malit të Zi para zgjedhjeve të së dielës që të votojnë për kandidatin që ka mbështetur të drejtat e tyre.

Letra e plotë e urimit

I Nderuar Zoti Ðukanovic,

Urime për fitoren bindëse që në raundin e parë të zgjedhjeve të djeshme presidenciale në Mal të Zi. Ju uroj nga zemra shumë suksese në drejtimin e mëtejshëm e të suksesshëm të Malit të Zi.

Fitorja Juaj ishte një mbështetje e qartë për konsolidimin e orientimit euroatlantik dhe evropian të vendit, si dhe garanci për forcimin e mëtejshëm të paqes dhe bashkëpunimit rajonal.

Jam i bindur se, gjatë mandatit Tuaj në drejtimin e Malit të Zi, marrëdhëniet e shkëlqyera e të fqinjësisë së mirë midis dy vendeve tona do të forcohen dhe zgjerohen edhe më tej.

Ju siguroj për vullnetin dhe dëshirën time për të punuar ngushtë me Ju në të ardhmen, në dobi të forcimit të këtij bashkëpunimi, por edhe për forcimin e paqes, stabilitetit dhe zhvillimit të rajonit tonë të përbashkët, ku dy vendet tona po japin një shembull të shkëlqyer.

Me dëshirën për t’Ju takuar në një rast sa më të parë, ju lutem pranoni, Zoti President i Zgjedhur, shprehjen e konsideratës sime më të lartë.

Artikulli paraprakTATIMET: 30 PRILLI, AFATI I FUNDIT I DEKLARIMIT PËR INDIVIDËT ME TË ARDHURA MBI 2 MLN LEKË
Artikulli tjetërGRUPI I PS, RAMA I PAKËNAQUR ME DEPUTETËT: TË PUNOJMË SIKUR ZGJEDHJET TË JENË KËTË QERSHOR