Thuajse dy muaj më parë platforma për arsimim shkencor ALMOOC në bashkëpunim me gjigandin Industrial të Teknologjisë së Informacionit MICROSOFT Windows App Studio shpalli konkursin “The Best of Almooc” nën moton “mësimi nuk ka qenë asnjëherë më zbavitës se kaq” me qëllim që të nxisë programuesit shqiptarë të ndërtojnë aplikacione për sistemin operativ Windows Phone.
Kjo garë ngjalli interesim tejet të madh tek të apasionuarit e teknologjisë si në Shqipëri ashtu dhe në Kosovë dhe vetë numri i pjesëmarrësve 1000+ tregon se sa është rritur shpirti garues tek shqiptarët për të tilla konkurse ndërkombëtare por njëkohësisht dëshmon se sa janë shqiptarët të prirur pas programimit në përgjithësi. Ishte pikërisht kjo arsyeja që Windows App Studio firmosi marreveshje me platformën ALMOOC për të nxitur talentet shqiptare të teknologjisë të ndërtojnë aplikacione për pajisjet e zgjuara (inteligjente) që përmbajnë sistemin operativ Windows Phone dhe të stimulojnë të rinjtë shqiptarë. Juria nën udhëheqjen e drejtuesit të Microsoft Windows App Studio Z. Bryan Tomlinson, në fazën e parë përzgjodhi mbi 200 aplikacione të cilat u filtruan në mënyrë shumë rigoroze dhe publikoi listën e limituar prej 20 aplikacionesh të cilat gjatë ceremonisë finale u prezantuan për audiencën e gjerë. Ndarja e shpërblimeve për më të mirët u realizua përmes një ceremonie paksa të rrallë (e-ceremony) e mundësuar nga vetë teknologjia e informacionit në të cilën të gjithë shqiptarët patën rastin t’a ndjekin vlerësimin për projektet e tyre në kohë reale. Juria me seli në shtetin e Washington-it drejtoi ceremoninë e ndarjes së shpërblimeve dhe u bashkëfacilitua në kohë reale nga qendrat në Prishtinë dhe Tiranë. Në këtë ceremoni u ndanë shpërblimet në tre kategori të ndryshme. Sponsorizuesit e këtij eventi Windows App Studio në koordinim me Microsoft Albania për kategorinë e parë dhuruan katër pajisje tabletë, tre nga të cilat u fituan nga konkurentët nga Prishtina dhe një nga Tirana, ndërsa në kategorinë e dytë u ndanë katër Smartphone Nokia Lumia. Në kategorinë e tretë u ndanë çertifikata mirënjohjeje për 4 fituesit e çmimit të tretë. Anëtari i jurisë Steven Yee mbeti i mahnitur dhe pohoi se shpërblimet e ofruara ishin fare simbolike në raport me cilësinë, kreativitetin dhe funksionalitetin e produkteve që shqiptarët ofruan në këtë garë tejet interesante. Për më tepër, kjo garë dëshmoi një nivel të lartë profesional të konkurentëve gjë që dëshmon se shqiptarët janë shumë të aftë në fushën e TIK-ut. Së fundi, organizatorët u zotuan që aktiviteti në fjalë është vetëm fillimi i bashkëpunimeve me Microsoft, dhe të tilla projekte do të ketë dhe në vazhdimësi falë partneritetit që platforma ALMOOC synon të ketë me Microsoft në të ardhmen e afërt.
