Ajo që ndodhi këtë mëngjes në ofiçinën “Casa dell’Auto” në rrugën Montagnola në Ankona ishte e frikshme.
Një punëtor shqiptar 27 vjeç që jetonte në Castelfidardo u plagos me djegie të shkallës së parë dhe të dytë në fytyrë dhe në gjymtyrët e sipërme.
Për fat të mirë, i riu me dhjetë vjet eksperiencë pune në kompani, u mbrojt nga dorezat dhe pajisjet e tjera të punës, që shmangën pasojat më të rënda.
Në zonë, përveç zjarrfikëses dhe Policisë, shkoi ambulanca dhe e Kryqit të Kuq dhe ajo e urgjencës.
Djali u dërgua në Torrete dhe ishte i vetëdijshëm në momentin kur e ngritën mjekët. Pavarësisht djegieve të rënda, duket se nuk është në rrezik për jetën. Incidenti ndodhi rreth orës 9:30.
“Punëtori ka punuar për ne për disa vjet dhe ka marrë pjesë në kurse të ndryshme të sigurisë, – tha pronari i ofiçinës, Nunzio Falappa. – Ai i kishte hequr valvulën dhe po e mbushte bombolën me ujë, por nuk e dimë se çfarë ka provokuar shkëndijën e zjarrit, ndoshta gazra kishin mbetur ende brenda.
Bombola prej 38 litrash ishte e destinuar për t’u asgjesuar. Ajo ishte zbrazur, por duhej të kalonte në një operacion rutinë që të garantohej pastrimi nga mbetjet e gazit dhe të mbushej me ujë. Punëtori e kishte bërë disa herë atë punë, por diçka, që duhet hetuar, bëri që të shpërthenin flakët.
Shpëtuesit e parë ishin vetë kolegët e punëtorit që fikën zjarrin.
