LA LIGA, BARCELONA FITON NË SEKONDAT E FUNDIT. Roma ia del mbanë të mposhtë Interin në “Olimpiko” duke e mundur me rezultatin 4-2 në një ndeshje me shumë episode.

Gervinho shënon golin e parë të takimit, ndërkohë që për Interin barazimin e gjen Ranocchia.  Me fillimin e pjesës së dytë është Cholevas ai që shënon një supergol pas depërtimit në zonë, por sërish skuadra e Mancinit gjen barazimin, këtë herë Osvaldo i ndihmuar edhe nga devijimi i mbrojtjes së Romës gjen rrjetën. Vetëm dy minuta zgjat ky barazim pasi Pjanic shënon golin e avantazhit në minutën e 70 dhe në fundin e takimit, kur po mbyllej gjithçka, si për të konkuruar për golin më të bukur të javës me Pirlon, shënon një eurogol nga goditja e dënimit për të mbyllur në mënyrën më të mirë të mundshme këtë fitore. 

 

Ka qenë mrekullia e Pirlos ajo që i dha fitoren Juventusit 4 sekonda nga përfundimi i ndeshjes ndaj Torinos me rezultatin 2-1. Në fillim shënon Vidal që në minutën e 15 për Juventusin, por Bruno Perez barazon shumë shpejt pas një vrapimi galopant për rreth 80 metra. Si të mos mjaftonte barazimi, skuadra e Alegrit mbetet edhe me 10 lojtarë në minutën e 33 të pjesës së dytë, kur Lichstainer del me të kuq. Kur dukej se gjithçka shkonte drejt barazimit në derbin e Torinos është Andrea Pirlo i cilli në momentet e vështira të skuadrës di të dhurojë një mrekulli për t’i dhënë fitoren. 

 

Milani është rikthyer tek fitorja pas pesë javësh dhe këtë herë ka mundur 2-0 Udinesen. Kuqezinjtë kanë kontrolluar lojën që në fillimin e saj, por vështirësitë mbeten të njëjta, ato të finalizimit të rezultatit. Në pjesën e dytë Domizzi ndalon Hondën brenda zonës dhe gjyqtari akordon një penallti dhe karton të kuq. 11-metërshi shndërrohet në gol nga Menez. Shumë shpejt edhe skuadra e Inzagit mbetet me 10 lojtarë pas daljes me kartonin e kuq të Essienit, por për fatin e kuqezinjve është sërish Menez ai që zgjidh gjithçka duke shënuar golin e dytë që i siguron Milanit fitoren dhe vendin e pestë. 

 

 

Nw kampionatin spanjoll Barcelona arriti një fitore shumë të mundimshme të dielën në mbrëmje ndaj Valencias. Në stadiumin “Mestalla”, skuadra e drejtuar nga Luis Enrique fitoi 1-0 me një gol të shënuar në sekondat e fundit të takimit nga Sergi Busquets. Në momentin kur blaugranat po festonin golin e fitores shumë pranë vendit ku qëndronin tifozët vendas, dikush nga publiku lëshoi një shishe me ujë drejt futbollistëve të Barcelonës. Shishja goditi në kokë argjentinasin, i cili iu drejtua arbitrit David Fernández Borbalán për t’u ankuar. Në këtë moment, arbitri e ndëshkoi sulmuesin e katalanasve me karton të verdhë për këtë arsye: “Në minutën e 89, Leo Messi u ndëshkua me karton të verdhë pasi vonoi rikthimin në fushën e lojës pas shënimit të golit duke dashur të vonojë lojën.” Me këtë fitore, Barcelona vazhdon të mbajë vendin e dytë me 31 pikë, vetëm 2 pikë larg Realit kryesues.