Bashkia Shkodër ka shpërndarë një postim në rrjetet sociale ku bën me dije se kryebashkiakja Ademi ka uruar kuqeblutë e Vllaznisë për sa më shumë suksese në sezonin e ri futbollistik.
Postimi: Kryetarja e Bashkisë, zj.Voltana Ademi i uron suksese Vllaznisë në sezonin e ri futbollistik. Përpara fillimit të seancës stërvitore të ditës së sotme, seancë që ishte e fundit në përgatitjet për ndeshjen e parë të kampionatit, kryetarja e Bashkisë Shkodër, zj. Voltana Ademi ka takuar futbollistët dhe stafin teknik të ekipit të Vllaznisë për t’u uruar suksese në sezonin e ri futbollistik.
Në fjalën e saj para skuadrës, kryebashkiakja ka garantuar mbështetjen dhe, po ashtu, ka kërkuar seriozitet maksimal nga ana e të gjithëve për të nderuar ashtu si duhet emrin që përfaqësojnë. Ajo ka evidentuar disa probleme që u shfaqën një sezon më parë dhe, sipas saj, kurrsesi ato nuk duhet të shfaqen në sezonin e ri.
Kryetarja e Bashkisë gjithashtu ka vlerësuar edhe faktin tjetër se tek Vllaznia më shumë futbollistë shkodranë sesa sivjet, nuk ka patur asnjëherë këto vitet e fundit dhe për rrjedhojë, ata e kanë për detyrë të japin edhe më shumë për të nderuar veten, familjet e tyre dhe qytetin.
Në fund të takimit, zonja Ademi u ka bërë të ditur futbollistëve dhe stafit teknik se do të jetë pranë tyre edhe në ndeshjen e nesërme në Fier, për t’i dhënë gjithë mbështetjen e duhur Vllaznisë në mënyrë që ajo ta nisë me fitore kampionatin e ri.
/ Star Plus TV /