Një ngjarje e rëndë është regjistruar në një kompleks argëtimi, në Jacksonville të Floridas, në Shtetet e Bashkuara të Amerikës, gjatë pasdites së sotme.
Të shtëna të shumta me armë janë dëgjuar në kompleks, ndërsa policia raporton për disa të vrarë dhe bën thirrje që njerëzit të shmangin zonën ku është regjistruar ngjarja.
Sulmi është regjistruar gjatë një turneu lojërash në Jacksonville Landing Area, në një moment kur qendra ishte frekuentuar nga një numër mjaft i madh njerëzish.
Në vendngjarje kanë mbërritur forca të shumta policie, ndërsa ende nuk ka detaje në lidhje me shkaqet dhe personat që kryen sulmin e armatosur.
Paraprakisht raportohet për të paktën 4 persona që kanë humbur jetën dhe rreth 11 të tjerë të plagosur, që janë transportuar në qendrat spitalore më të afërta.
