Spahiu shpërthen ndaj Bashës: Pazar, theu besën, ka një orë afat
Nuk ka marrëveshjes mes PD dhe Kreshnik Spahiu të Aleancës Kuqezi për listat e deputetëve në zgjedhjet e 25 qershorit. Kryetari i Aleancës Kuqezi deklaroi pas takimit me Bashën se kryetari i PD e kishte thyer besën e lidhur në çadër, ndërsa i ka dhënë një orë afat për reflektim. Kreshnik Spahiu paralajmëroi se nëse nuk arrihet marrëveshja me PD, që ai të futet në listat e kandidatëve për deputetë do të largohet nga politika. “Kemi qenë përballë një lufte tre mujore për rrëzimin e Edi Ramës. Marrëveshja u hoqi mundësinë partive të regjistroheshin në zgjedhje. Ne vendosëm mos të regjistrojmë partinë në KQZ në premtimin e Bashës se do të përfaqësoheshim në lista si kryetarë, ne do të grupoheshim në logon e PD për të maksimalizuar votat e opozitës. Që nga ajo ditë unë nuk i kam konsideruar si pazar listat e deputetëve, pasi kam qenë në garancinë e Bashës, pasi lidhi besën me kuqezinjtë për 90 ditë. Por edhe në besëlidhjen e Bashës se të gjithë do të përfaqësoheshim në listat e PD, se po vetësakrifikoheshim. Kam pasur një bisedë me Bashën dhe nuk kemi rënë dakord, disa parime unë nuk mund t’i tradhtoj dhe për një orë pretendimet e AK, Basha ti konsultojë me kryesinë. Po kalojmë një situatë të vështirë. Nëse nuk reflektohet do të jap dorëheqjen dhe do të tërhiqem nga politika” deklaroi ai.
