Pas pushimeve të shkurtra të festave të fundvitit, Vettingu do të rikthehet në datën 4 janar me ritme të larta që në nisje të vitit të ardhshëm.

Kështu, seanca e parë për Komisionin e Pavarur të Kualifikimit do të nisë më 4 janar më kreun e Gjykatës së Sarandës Alltun Çela, për të vijuar me dy kolegë të tij magjistratë në datat 8 dhe 9.

Ndërkohë që të paktën tre seanca ka planifikuar për muajin janar edhe Kolegji i Posaçëm i Apelimit, shkalla e dytë e “Vetting”-ut, ku ankimohen vendimet e Komisionit të Pavarur të Kualifikimit.

Ritmet e “Vetting”-ut vijojnë të mbeten të ulëta, duke parë se në vitin e parë të procesit kaluan në sitë më pak se 10% e magjistratëve, por gjithsesi me një efekt dramatik në sistemin e drejtësisë. 77 magjistratë kaluan në sitën e “Vetting”-ut nga marsi deri në dhjetor të këtij viti.

Testit të pasurisë, integritetit e profesionalizmit nuk i kanë mbijetuar dot 45% e magjistratëve të kaluar në sitë gjatë këtyre muajve. Nga 77 gjyqtarë, prokurorë, e asistentë ligjorë, u konfirmuan 45 dhe u shkarkuan 35.

Numri i të shkarkuarve pritet të rritet edhe më tej, ndërkohë që disa prej të konfirmuarve rrezikojnë të shkarkohen nga shkalla e dytë e “Vetting-ut”, Kolegji i Posaçëm i Apelimit.