Vllaznia ka fituar ndeshjen miqësore përballë Erzenit në shifrat 2-1, takim i luajtur në stadiumin “Loro Boriçi” të Shkodrës. Edhe pse nuk kishin një kundërshtar të fortë përballë, ky takim me shijakasit shërbeu për të parë lojtarët e rinj që kanë ardhur në merkato tek Vllaznia.
Golin e parë për Vllazninë e shënoi Marku përmes një penalltie në pjesën e parë. Kuqeblutë në minutën e 28-të me anë të Imerit shënojnë golin e dytë. Pas dy minutash maqedonasi Isaevski ndëshkohet me karton të kuq për Vllazninë për protestë ndaj arbitrit. Në fillimin e pjesës së dytë është Çema ai që ngushton diferencën në 2-1 dhe vulos rezultatin përfundimtar të këtij takimi. Pas ndeshjes trajneri i Vllaznisë Thomas Brdariç tha se është e vështirë për t’i bindur lojtarët për të ardhur tek Vllaznia edhe për shkak se nuk ka edhe aq shumë para por edhe për shkak të së kaluarës vitet e fundit të këtij ekipi..
Tekniku i Vllaznisë shprehet se skuadra ka nevoj për një sulmues për të finalizuar aksionet.
Sa i përket objektivave për Kupat e Europës, ndryshe nga fillimi trajneri Brdariç deklaroi se është e vështirë pavarësisht se drejtuesit nga ana tjetër pretendojnë një vend në Kupat e Europës në fund të sezonit. Edhe përballjen me ekipe si Tirana, Teuta, Kukësi apo Laçi që janë aktualisht në Europë i parashikon të vështira.
Vllaznia pritet që të zhvillojë edhe ndonjë ndeshje tjetër miqësore duke qenë se ka ende kohë deri më 12 shtator kur nis kampionati.
