Prokuroria e Busto Arsizio-s në Itali ka kërkuar burgim të përjetshëm për 5 shqiptarët që dyshohet të jenë autorët e vrasjes së dy kushërinjve Agron dhe Alban Lleshaj. Ngjarja e rëndë ndodhi ndërmjet 9 dhe 10 nëntor të 2016 në Canegrate të Milanos. Autorë të krimit dyshohet të jenë 5 shqiptare , Edmond, Elidon, Pjetër Ll., E. N e F. S., të cilët aktualisht janë pas hekurave.
Prokuroria bëri këtë kërkesë gjatë seancës gjyqësore që u zhvillua dje. Nga hetimet e deritanishme rezulton se atentati i përgjakshëm u bë për pazare droge. Po ashtu ka dyshime se dy viktimat dhe të pandehurit ishin pjesë e grupeve rivale për shitjen e drogës. Sakaq, dënimi për 5 të akuzuarit pritet të jepet në muajin shtator.
Rreth mesnatës midis 9 – 10 nëntorit të vitit 2016, dy kushërinjtë shqiptarë Agroni dhe Albani, 29 dhe 36 vjeç, banues në Kanegrate, ishin duke udhëtuar me makinë, kur ata u qëlluan me breshëri plumbash.
Një nga shqiptarët që ishte në vendin e pasagjerit ndërroi jetë fill pas ngjarjes, ndërsa shoferi arriti të ngiste makinën për disa qindra metra dhe më pas bëri aksident. Aty ai ndërroi jetë.
