Autoriteti Kombëtar i Ushqimit (AKU) në Shkodër ka ndaluar sërish një sasi të konsiderueshme misri të importuar nga Serbia — 75 tonë të bllokuara në doganën e Hanit të Hotit dhe dërguar për analiza laboratorike. Vetëm pak ditë më parë, i njëjti eksportues kishte pasur në ndalim edhe 25 tonë misri, duke çuar në 100 tonë sasinë totale të bllokuar deri tani.
Sipas njoftimit të AKU Shkodër, kontrollet synojnë të përcaktojnë nëse produkti përmban nivele të rrezikshme të aflatoksinës B1 — një substancë toksike dhe kancerogjene që mund të tejkalojë normat e lejuara në vend. Njëkohësisht, autoritetet kanë urdhëruar bllokimin e një ferme në fshatin Trush, pasi sistemi i gjurmueshmërisë tregoi se ajo furnizohej me misër blegtoral nga subjekti i ndaluar në doganë.
Nëse analizat konfirmojnë praninë e substancave të ndaluara, mallrat nuk do të lejohen të futen në territorin shqiptar dhe do të ndiqen masat e përshtatshme sipas ligjit.
