Specialistët e Sektorit të Qarkullimit Rrugor arrestuan shtetasin A. H., 47 vjeç, banues në Shkodër, pasi u kap duke drejtuar automjetin, në gjendje të dehur.
Specialistët e Seksionit për Hetimin e Narkotikëve referuan materialet në Prokurori, ku nisi procedimi në gjendje të lirë për shtetasin E. M., 18 vjeç, banues në fshatin Trush, pasi gjatë kontrollit fizik, shërbimet e Policisë i gjetën një sasi lënde të dyshuar narkotike Kokainë, e cila u sekuestrua në cilësinë e provës materiale.
Specialistët për Hetimin e Krimeve të Komisariatit të Policisë Vau i Dejës referuan materialet në Prokurori, ku nisi procedimi penal për shtetasit:
-D. P., 37 vjeç, banues në fshatin Mjedë, pasi dyshohet se është larguar nga banesa, bashkë me fëmijën e mitur, pa miratimin e bashkëshortes së tij;
-A. H., 34 vjeç, banues në fshatin Mjedë, pasi ka kallëzuar shtetasi P. H., 64 vjeç, banues në fshatin Mjedë, se kamerat e vendosura te banesa e 34-vjeçarit filmojnë edhe pronën e tij.
Më datë 01.04.2026, ka kallëzuar shtetasja A. V., 37 vjeçe, se është hapur një llogari në rrjetin social “TikTok”, ku postohen përmbajtje fyese dhe denigruese për të. Vijojnë hetimet mbi këtë kallëzim.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
Malësi e Madhe/Rreth orës 10:30, në fshatin Kalldrun, është gjetur në liqen, trupi i pajetë i shtetases Gj. K., 85 vjeçe, e cila dyshohet se është vetëmbytur. Sipas kallëzimit të vajzës së saj, shtetasja Gj. K. ishte larguar nga banesa, dje paradite, dhe vuante nga skleroza.
Grupi hetimor po punon për dokumentimin e rrethanave të rastit.
