Vllaznia e basketbollit për meshkuj po kalon një moment të shkëlqyer forme. Kuqeblutë kanë arritur fitoren e 10-të radhazi, duke mposhtur Golden Eagle Yllin e Suharekës me rezultatin 79-70 në Ligën Unike. Skuadra e drejtuar nga trajneri Eni Llazani vinte në këtë sfidë pas suksesit dramatik ndaj Tiranës 85-82, që e ka ngjitur në vendin e dytë të Superligës, ndërsa ndaj Yllit konfirmoi edhe një herë pretendimet e saj përballë një kundërshtari cilësor. Ndeshja nisi më mirë për kosovarët që fituan periodën e parë 16-23, por Vllaznia reagoi menjëherë duke marrë të dytën 21-11 dhe duke shkuar në pushim me avantazhin 37-34. Perioda e tretë ishte vendimtare për shkodranët, që krijuan diferencë deri në +12 pikë, ndërsa në fund menaxhuan epërsinë për ta mbyllur takimin 79-70. Pas kësaj fitoreje, trajneri i Vllaznisë, Eni Llazani, vlerësoi paraqitjen e skuadrës së tij, duke theksuar karakterin dhe seriozitetin që po tregon ekipi në këtë periudhë pozitive.
