Vllaznia e basketbollit për meshkuj ka arritur një fitore të rëndësishme në kampionat, duke mposhtur Tiranën me rezultatin e ngushtë 85–82, në një ndeshje tepër të luftuar deri në sekondat e fundit. Takimi, i zhvilluar në një atmosferë elektrizuese dhe nën mbështetjen e zjarrtë të tifozërisë shkodrane, dhuroi emocione të shumta, me skuadrat që u alternuan disa herë në avantazh. Megjithatë, në momentet vendimtare, kuqeblutë treguan më shumë qetësi dhe saktësi në finalizime, duke siguruar fitoren përballë bardhebluve. Trajneri i Vllaznisë, Eni Llazani, pas triumfit 85–82 ndaj Tiranës, deklaroi se skuadra kishte përjetuar trysni nga Federata Shqiptare e Basketbollit, por pavarësisht kësaj arriti të dalë fituese.
Kjo fitore entuziazmoi pa masë rreth 1200 tifozë të pranishëm në pallatin e sportit “Qazim Dervishi”, të cilët mbështetën vazhdimisht gjatë ndeshjes ekipin e Vllaznisë.
