Befasia e javës së 27-të të “Abissnet Superiore” ka ardhur nga Vlora, aty ku Flamurtari mposhti Vllazninë kryesuese me rezultatin e ngushtë 1-0. Goli vendimtar erdhi në minutën e 35’, kur Bolzan, pas assistit të sulmuesit shkodran Erald Maksuti, dërgoi topin në rrjetë për t’i dhënë avantazhin vendasve. Skuadra shkodrane u përball edhe me vështirësi më të mëdha, pasi Charles u ndëshkua me karton të kuq vetëm dy minuta më vonë, duke lënë Vllazninë me 10-futbollistë. Megjithatë, të besuarit e Edi Martinit kërkuan barazimin deri në fund, por pa sukses. Pas humbjes, trajneri Edi Martini tha se ndihet i keqardhur, si dhe shtoi që ndikoi kartoni i kuq i Charles, që sipas teknikut të kuqebluve ishte pa lidhje në fushë të kundërshtarit.
Nga ana tjetër, Andi Ribaj, trajneri i Flamurtarit, foli pas triumfit që ekipi i tij arriti në shtëpi ndaj Vllaznisë, teksa tha se fitorja me kuqeblutë ishte e merituar.
Pas kësaj humbje të kuqebluve, në krye të klasifikimit rifillon gara për titullin, teksa Vllaznia sheh që Elbasani i afrohet vetëm dy pikë pas fitores me Tiranën. Ndërkohë, shkodranët nxjerrin një mësim të mirë nga kjo ndeshje, duke treguar se asnjë kundërshtar nuk mund të nënvlerësohet.
