Çështja e Sokol Mjaçaj, autorit të vrasjes së dy turistëve çek në korrikun e vtit të kaluar është ankimuar në gjykatën e apelit në Shkodër.
Pala mbrojtëse e autorit të vrasjes së dyfishtë ka vendosur që ta çojë edhe në apel këtë çështje duke kërkuar një dënim tjetër dhe të paktën të pranohet ekspertiza e një grupi psikologësh për 20 vjeçarin. Ankimimi për Sokol Mjaçaj në gjykatën e apelit mësohet se është bërë me 15 janar të këtij viti, 2 muaj pas marrjes së vendim në gjykatën e rrethit gjyqësor Shkodër. Në 16 nëntorin e vitit të kaluar në shkallën e parë u mor vendimi për Mjaçajn teksa u dënua me burgim të përjetshëm për vrasjen e dy turistëve çek, çiftit Michael Svatos dhe Anna Kosinova gjatë rrugës së kthimit nga Dakugjini në Shkodër. Edhe pse Mjaçaj kërkoi mëshirë, trupi gjykues në shkallën e parë e dënoi atë me burg përjetë. Mbrojtja përmes avokates së Sokol Mjaçaj pati shumë kritika për këtë çështje dhe tha se e gjitha është e paragjykuar ndaj 20 vjeçarit pa marrë parasysh mënyrën se si është rritur, varfërinë e tij, anën psikologjike dhe arsyet se pse ka dalë për të grabitur pasditen e 3 korrikut kur edhe ndodhi ngjarja. Në gjykatën e apelit ende nuk është vendosur se kur do të jetë seanca gjyqësore dhe çështja ëshë në pritje. Afati është 6 muaj që pas ankimimit dhe deri me 15 korrik të këtij viti Mjaçaj do të dalë përpara gjykatës së apelit. Pritet që mbrojtja e të riut që vrau dy turistët çek të mos lëviz nga kërkesat ndërsa duhet parë se cili do të jetë vendimi, nëse do të lihet në fuqi burgimi përjetë i shkallës së parë apo do të ketë një vendim tjetër. Sokol Mjaçaj në tentativë për të grabitur çiftin Svatos, Kosinova ka qëlluar në drejtim të tyre duke vrarë fillimisht shoferin e më pas edhe 36-vjeçaren, ngjarje e cila ndodhi pak kohë pasi Mjaçaj ishte liruar pas dënimit që vuajti më parë për një tjetër ngjarje të rëndë për të cilën ishte një prej të akuzuarve.
