29 vajza dhe 25 djem do të bëhen pjesë e Forcave të Armatosura të Shqipërisë me gradën nëntoger. Ata janë diplomuar pas përfundimit të Kursit 1-vjecar të Përgatitjes së Oficerit.

Në ceremoninë e zhvilluar me këtë rast, Ministri i Mbrojtjes Niko Peleshi theksoi faktin se koha që po jetojmë ka vendosur figurën e ushtarakut më në qendër të opinionit publik se kurrë më parë. Ministri u shpreh se sakrifica që kërkon ky profesion tashmë shpërblehet me një trajtim financiar më të mirë që në fillimet e karrierës.

“Premtimi për rritjen e pagave të ushtarakëve në masën 30% është realitet që ju do prekni pikërisht vetëm fare pak ditë pas kësaj ceremonie titullimi. Idealizmi i ushtarakut kurrë nuk ka patur një barazvlefshmëri me shpërblimin financiar dhe zor e gjen edhe tek ushtritë më të mëdha dhe të përparuara në botë. Por, unë personalisht me mbështetjen e pakursyer të Kryeministrit e ndjenim si obligim moral që FA ta rrisin integritetin e tyre dhe përmes trajtimit dinjitoz financiar. Një motivim që besoj se do të ushqejë pasionin tuaj për unfirmonën dhe do i japë asaj respektin e merituar“, u shpreh gjatë fjalës së tij ministri Peleshi.

Ministrit i Mbrojtjes tha se në këtë kurs ka ardhur duke u rritur pjesëmarrja e rekruteve femra, gjë që tregon se barazia gjinore është ndër prioritetet e FA dhe Ministrisë së Mbrojtjes. Në ceremoninë e emërimit të oficerëve të rinj morën pjesë edhe Komandanti i Akademisë së FA Gjeneral Brigade Albert Mullai si dhe familjarë të të diplomuarve.

Artikulli paraprak“MAQEDONIA E VERIUT KA FILLUAR BISEDIMET ME BE-NË”, KOVAÇEVSKI: GJUHA JONË ËSHTË E PASTËR NË KORNIZËN NEGOCIUESE
Artikulli tjetërCOVID-19/ 1228 QYTETARË TË INFEKTUAR DHE TRE HUMBJE JETE NË 24 ORËT E FUNDIT