Kontrollet e imtësishme në Pikën e Kalimit Kufitar PKK Muriqan kanë çuar në goditjen e dy rasteve të paligjshmërisë brenda vetëm 12 orëve të fundit, duke zbuluar trafikim të lëndëve narkotike dhe mosdeklarim të shumave të mëdha parash.
Shërbimet e Policisë Kufitare, në hyrje të Republikës së Shqipërisë, kanë proceduar penalisht në gjendje të lirë një shtetas polak, Ë. C., 49 vjeç.
Gjatë kontrollit fizik, atij iu gjetën 30 000 euro të padeklaruara, ndërsa në çantën e dorës mbante edhe 8 000 euro të tjera, gjithashtu jashtë deklarimit ligjor. Në total, autoritetet sekuestruan 38 000 euro.
Ndërkohë, në një tjetër rast, specialistët për Hetimin e Narkotikëve vunë në pranga dy shtetas nga Tirana, A. Sh., 42 vjeç, dhe E. K., 32 vjeç.
Gjatë kontrollit në dalje të territorit shqiptar, në automjetin me të cilin udhëtonin, u zbuluan të fshehura 8 qese me lëndë të dyshuar narkotike kanabis, me peshë rreth 4.2 kilogramë.
Sipas veprimeve të para hetimore, dyshohet se lënda narkotike ishte siguruar në Gjermani, duke ngritur dyshime për një linjë të mirëorganizuar të trafikimit ndërkombëtar.
Materialet procedurale janë referuar pranë Prokurorisë së Shkodrës për veprime të mëtejshme, ndërsa kontrollet në kufi vijojnë të jenë të përforcuara për të parandaluar raste të ngjashme.
