Një aksident ka ndodhur paraditën e sotme në aksin Shkodër – Koplik, një prej rrugëve më të rrezikshme në zonë, ku janë përplasur dy automjete. Sipas informacioneve paraprake, përplasja ka shkaktuar vetëm dëme materiale, ndërsa dy drejtuesit e mjeteve janë dërguar në spital për të marrë ndihmë mjekësore dhe fatmirësisht janë jashtë rrezikut për jetën.
Në vendngjarje ka mbërritur menjëherë grupi hetimor dhe po punon për të sqaruar me detaje rrethanat dhe shkaqet e aksidentit. Autoritetet kanë apeluar tek drejtuesit e mjeteve për kujdes maksimal, respektim të shpejtësisë dhe të rregullave të qarkullimit, sidomos në këtë aks të njohur për rrezikshmërinë e tij.
Ky aks ka qenë dëshmitar i aksidenteve të shumta në muajt e fundit. Vetëm një ditë më parë, në të njëjtin aks u regjistrua një tjetër aksident tragjik me pasoja fatale.
