Dy persona kanë humbur jetën në një aksident të rëndë që ndodhi në autostradën A22, mes Bressanone dhe Chiusa, në Itali. Aksidenti ndodhi në korsinë veriore rreth orës 06:45 të mëngjesit, pranë pikës së pagesës në Chiusa. Një furgon i një kompanie lokale u përplas me forcë me një kamion me targa të huaja, i cili dyshohet se ishte ndalur në radhë.
Dy viktimat janë punëtorë nga Kosova që ndodheshin në furgon; kabina e drejtimit u shkatërrua plotësisht dhe ata mbetën të bllokuar brenda. Një person tjetër është plagosur rëndë dhe është transportuar me urgjencë në spital, ndërsa një i katërt ka pësuar lëndime më të lehta, raportohet në media. Për pasojë, trafiku në të dy drejtimet u bllokua për disa kilometra, përpara se të rifillonte me radhë të gjata dhe ngadalësime.
Në vendngjarje ka shkuar helikopteri i emergjencës Pelikan 2, Kryqi i Bardhë me mjekë dhe ndihmës, zjarrfikësit vullnetarë nga Chiusa, Bressanone dhe Varna, policia rrugore dhe shërbimi i ndihmës shpirtërore emergjente.
