Në lagjen Kiras të qytetit të Shkodër, familja e Agron dhe Sabrije Kelo jeton prej vitesh në kushte tërësisht të vështira, mes frikës dhe pasigurisë për jetën.
Çifti jeton bashkë me dy djemtë e tyre në një banesë të dëmtuar rëndë, e cila është shkatërruar që pas tërmetit. Muret e çara, tavanet e rëna dhe amortizimi nga viti në vit e kanë kthyer shtëpinë në një rrezik të vazhdueshëm për ta.
Situata është rënduar edhe më shumë pas stuhisë së disa ditëve më parë, ku banesa pësoi dëmtime të tjera, duke rrezikuar seriozisht jetën e familjes.
Sabrija tregon se, pavarësisht shqetësimeve dhe kërkesave të ngritura ndër vite, askush nuk u ka ardhur në ndihmë.
Ajo shprehet se familja jeton çdo ditë me frikën se çatia mund t’u shembet mbi kokë në çdo moment.
Familja Kelo shpreson që zëri i tyre të dëgjohet, pasi çdo ditë e kaluar në atë banesë është një betejë mes pasigurisë dhe frikës për jetën. Në kushte të tilla, ata kërkojnë vetëm një strehë të sigurt ku të mund të jetojnë.
