Policia e Lezhës ka shtuar kontrollet në zonën turistike të Shëngjinit për monitorimin e nivelit të zhurmave, në kuadër të masave për garantimin e rendit dhe qetësisë publike gjatë sezonit veror.
Sipas Policisë, krahas kontrolleve në terren, janë zhvilluar edhe takime sensibilizuese me administratorë biznesesh dhe persona fizikë, aktiviteti i të cilëve shoqërohet me përdorimin e muzikës, me qëllim informimin mbi detyrimet ligjore për respektimin e nivelit të lejuar të zhurmës.Strukturat e Drejtorisë Vendore të Policisë Lezhë, në bashkëpunim me Komisariatin e Policisë, kanë kryer kontrolle të vazhdueshme në zonat e identifikuara me ndotje akustike. Gjatë këtyre kontrolleve janë përdorur matës të posaçëm për të verifikuar nivelin e zhurmës në ambiente të hapura dhe të mbyllura, në përputhje me parashikimet e ligjit për administrimin e zhurmës në mjedis. Sipas rezultateve të matjeve të kryera, niveli i zhurmës në subjektet e kontrolluara ka rezultuar brenda kufijve të lejuar nga legjislacioni në fuqi.Njëkohësisht, efektivët e Policisë kanë verifikuar edhe respektimin e orarit të lejuar për muzikën në ambiente të hapura, i cili në zonat e banuara është nga ora 11:00 deri në orën 24:00.Policia e Lezhës bën të ditur se kontrollet dhe monitorimi do të vijojnë gjatë gjithë sezonit turistik, me synim garantimin e qetësisë për banorët dhe pushuesit që frekuentojnë bregdetin e Shëngjinit.Gjithashtu, qytetarët ftohen të denoncojnë çdo rast të shkeljes së rregullave për ndotjen akustike ose cenimin e rendit publik, ndërsa Policia garanton reagim të menjëhershëm dhe veprim në përputhje me ligjin.
