Ambasadorët britanikë dhe gjermanë në Kosovë, Jonathan Hargreaves dhe Jorn Rohde kanë reaguar pas ngërçit të krijuar sot në kuvendin e Kosovës ku partitë politike nuk kanë gjetur konsensus për konsituimin e kuvendit.
Ambasadori britanik Jonathan Hargreaves tha se Kosovës i duhet kuvend dhe qeveri funksionale.
“Më shumë se dy muaj që prej kur populli i Kosovës votoi në zgjedhje, Kosova urgjentisht ka nevojë për një kuvend dhe qeveri funksionale. Populli ka të drejtë të presë që liderët e tyre politikë të punojnë së bashku në interes kombëtar”, ka shkruar Hargreaves.
Ndërsa ambasadori i Gjermanisë, Jorn Rohde, ka ka thënë se më shumë se dy muaj pas zgjedhjeve, Kuvendi i Kosovës ka mbetur i bllokuar si rezultat “i taktikave bllokuese”.
Diplomati gjerman ka thënë se qytetarët meritojnë politikanë që prioritizojnë Kosovën mbi politikat e partisë.
“Prandaj e përsëris: Duhet urgjentisht një bashkëpunim i mirëfilltë për të siguruar funksionimin e institucioneve dhe formimin e shpejtë të një qeverie të qëndrueshme”, ka përfunduar Rohde.
Sot vazhdoi seanca konstituive që u ndërpre të hënën, por kryetari Avni Dehari, ftoi në konsultime përfaqësuesit e partive politike dhe pas konsultimit, ai tha se nuk ka konsensus se si të vazhdohet tutje.
Dehari njoftoi se seanca do të vazhdojë më 19 prill në orën 12:00.
