Ish presidenti i Shqipërisë Bujar Nishani zhvilloi një vizitë në shtëpinë muze të Dedë Gjo Lulit në fshatin Bardhaj të Hotit në Malin e Zi në kuadër të 110 vjetorit të kryengritjes në Malësinë e Madhe me në krye Dedë Gjo Lulin më 6 prill 1911. Ish Presidenti Nishani vlerësoi figurën e atdhetarit Dedë Gjo Luli i cili ngriti flamurin shqiptar dhe nuk u dorëzua asnjëherë në duart e pushtuesve.
Ish Presidenti Nishani kërkoi që këto data të rëndësishme historike dhe këto personazhe që u flijuan për pavarësinë e Shqipërisë të vlerësohen dhe përkujtohen më shumë si dhe të ketë një vëmendje më të madhe edhe nga politika.
Nikollë Camaj, kryetar i Lidhjes Demokratike Shqiptare në Malin e Zi vendosi theksin tek rëndësia e përcjelljes së historisë tek brezat ndërsa profesor Lulash Palushaj i vlerësuar me titullin “Kalorës i Urdhërit të Skenderbeut” nga Presidenca kërkoi që 6 prillit të jetë festë kombëtare për Shqipërinë.
Kjo vizitë në shtëpinë muze të Dedë Gjo Lulit e cila edhe pse u dogj 6 herë nga serbët arriti që rrënojat t’i ketë dhe u restaurua në vitin 2006 është shumë e rëndësishme për shqiptarët e Malit të Zi që vijojnë të jetojnë në ato troje pavarësisht vështirësive ekonomike dhe mungesës së mbështetjes nga qeveria malazeze për vite me radhë.
