
Mbi 10 mijë metra katrorë sipërfaqe pyjore janë dëmtuar dhe tjetërsuar në mënyrë të paligjshme në masivin pyjor pranë Kishës së Shna Ndout në Laç, ndërsa janë hapur edhe rreth 3 kilometra rrugë për qëllime ndërtimi. Denoncimi është bërë nga përfaqësuesi i opozitës në Këshillin Bashkiak të Kurbinit, njëkohësisht edhe specialist i pyjeve, Albert Ndoci.Sipas tij, kjo që po ndodh është një masaker mjedisore dhe institucionet përgjegjëse vijojnë të heshtin, duke lejuar shkatërrimin e një zonë me vlera të mëdha natyrore dhe historike, pasi aty ndodhej dikur edhe qendra administrative e Sebastias.
Specialisti i pyjëve i bën thirrje SPAK-ut të ndërhyjë dhe të hetojë këtë çështje, duke kërkuar që përgjegjësit të vihen përpara drejtësisë për dëmin e shkaktuar.
Ndërkohë, grupi i këshilltarëve të opozitës në Këshillin Bashkiak të Kurbinit i ka kërkuar zyrtarisht bashkisë të ndërhyjë dhe të ndalojë shkatërrimin e mëtejshëm të masivit pyjor, por janë përballur me mungesë totale reagimi nga institucioni vendor.


