Pavarësisht temperaturave të larta që kanë përfshirë vendin gjatë kësaj vere, qarku i Lezhës është përballur me një numër më të ulët zjarresh krahasuar me vitet e mëparshme. Sipas të dhënave të Mbrojtjes Civile në Prefekturën e Lezhës, gjatë muajve qershor dhe korrik janë regjistruar 28 raste, kryesisht në sipërfaqe pyjore, kullota dhe toka të papunuara.Në tre prej këtyre rasteve ka qenë e nevojshme ndërhyrja nga ajri me helikopter, ndërsa në operacionet e shuarjes kanë marrë pjesë edhe forcat e ushtrisë, në mbështetje të strukturave vendore dhe zjarrfikësve.
Ndërkohë, me vijimin e temperaturave të larta edhe gjatë muajit gusht, strukturat e Mbrojtjes Civile mbeten në gatishmëri të plotë në të tre bashkitë e qarkut, Lezhë, Kurbin dhe Mirditë. Autoritetet theksojnë se monitorimi i territorit vijon pa ndërprerje dhe u bëjnë apel qytetarëve të tregojnë kujdes maksimal, duke shmangur çdo veprim që mund të shkaktojë zjarre, veçanërisht në zonat pyjore dhe pranë tokave me bimësi të thatë.
