Festohet hapja e klasave te muzikes ne Lezhe, nxenesit instrumentist koncert ne pallatin e kultures
Plot dhjetë vite më parë, në shkollën 9-vjeçare “Besëlidhja” në Lezhë u hodhën themelet e një projekti të veçantë, hapja e klasave të muzikës. Sot, ajo nismë është kthyer në një histori suksesi që u përmbyll me një aktivitet festiv madhështor në Pallatin e Kulturës, ku u kremtua përvjetori i parë i dekadës artistike.Në një mbrëmje të mbushur me emocione, dhjetëra nxënës të talentuar interpretuan pjesë të njohura nga repertori klasik shqiptar dhe ndërkombëtar.
Artdashësit lezhjanë u bënë dëshmitarë të një performance që përfaqëson jo vetëm punën dhe përkushtimin e fëmijëve, por edhe gjithë kontributin e dhjetra mësuesve dhe drejtuesve të shkollës.Një element që e bëri koncertin të veçantë ishte ngjitja në skenë e muzikantëve që kanë përfunduar këtë shkollë dhe atyre që e vijojnë , të cilët, përmes interpretimeve të tyre të sinkronizuara, krijuan një ndjesi të thellë artistike. Duartrokitjet e zgjatura ishin tregues i qartë i emocioneve që ngjalli kjo ngjarje kulturore.
Drejtori Rajonalë i Arsimit Parauniversitar në Lezhë, z. Hasan Muça, vlerësoi këtë arritje si një ringjallje të traditës së hershme muzikore që qyteti ka pasur, duke e konsideruar shkollën “Besëlidhja” si një model për t’u ndjekur.
Përgjatë 90 minutave të koncertit, skena u mbush me energji, përkushtim dhe një nivel interpretimi që i tejkaloi pritshmëritë. Kjo ngjarje jo vetëm që do të kujtohet gjatë nga publiku, por gjithashtu rrit standardet për aktivitetet artistike të ardhshme në Lezhë
