Orkestra Simfonike e Forcave të Armatosura u ndal në Lezhë, duke sjellë një mbrëmje të veçantë për publikun artdashës. Nën tingujt e muzikës klasike, orkestra mbajti një koncert në Pallatin e Kulturës, ku u interpretuan disa nga veprat më të njohura të kompozitorëve Antonio Rosetti, Max Bruch dhe W. A. Mozart, duke sjellë një program të pasur artistik.
Nën interpretimin e solistëve Briken Burgjia, Keli Gavelli, Igli Zeqiri dhe Anxhelo Xhaja, si dhe dirigjimin e Laert Qazimit dhe Harlen Nikollit, u krijua një atmosferë e ngrohtë muzikore, e shoqëruar me duartrokitje nga publiku i pranishëm.
Organizatorët e konsideruan koncertin një mundësi për të afruar publikun me muzikën simfonike dhe për të pasuruar jetën kulturore të qytetit.
Koncerti i Orkestrës Simfonike të Forcave të Armatosura zgjati rreth 90 minuta dhe u karakterizua nga emocione dhe vlerësim për muzikën klasike.
