Rënia e ortekëve ka bllokuar plotësisht rrugën pranë tuneleve panoramike në aksin Qafë Thore – Theth, duke e bërë të pamundur qarkullimin e automjeteve në këtë zonë.
Sipas njoftimit të autoriteteve, megjithë ndërhyrjen me freza për pastrimin e borës, puna është pezulluar pasi ortekët vijojnë të jenë aktivë, duke rrezikuar sigurinë e punëtorëve dhe mjeteve të pastrimit.
Për arsye sigurie, qarkullimi në zonën e Qafë Thores është ndaluar deri në përmirësimin e kushteve atmosferike dhe ndalimin e rënies së ortekëve.
Autoritetet u bëjnë apel drejtuesve të mjeteve të respektojnë sinjalistikën rrugore, të shmangin këtë segment dhe të ndjekin njoftimet zyrtare për çdo përditësim të mëtejshëm mbi situatën.
