Trajneri Artan Kalaja i cili ditën e sotme bëri një deklaratë për sa i përket mosemërimit të tij si trajner i volejbollit për femra pas një periudhe disa mujore pune, është pasuar me një deklaratë të Sportklub Vllaznia.
DEKLARATA E PLOTË
Deklaratë e SK Vllaznia
Në lidhje me deklaratën e Artan Kalaja, në cilësinë e drejtuesit të SK Vllaznia, dua të sqaroj opinionin publik se:
SK Vllaznia si institucion në varësi të Bashkisë Shkodër në vazhdimësi ka falenderuar sportistët dhe trajnerët për punën e palodhur dhe rezultatet e tyre të arritura ndër vite në rang kombëtar e ndërkombëtar.
Në ekipet tona kanë drejtuar dhe drejtojnë trajnerë me kontratë pune dhe vullnetarë me të vetmin objektiv “rritjen e rezultateve dhe cilësisë sportive të sportistëve dhe ekipeve tona“.
Meqënëse për disa ekipe janë mbyllur aktivitetet sportive dhe sportistet do të kenë 2 muaj pushim, është e drejtë e SK Vllaznia dhe Bashkisë për të menduar dhe vepruar për organizimin e punës së ekipeve dhe trajnerëve për sezonin 2020-2021. Në këtë kuader veprimi bën pjesë edhe angazhimi i trajnerëve vullnetarë të cilët përzgjidhen nga trajneret me kontratë dhe miratohen nga Klubi.
SK Vllaznia duke patur parasysh CV e zotit Artan Kalaja ka pranuar propozimin e trajnerit Lisha për angazhimin e tij si trajner vullnetar dhe e ka falenderuar për kontributin e tij me ekipin e volejbollit të vajzave të rritura gjatë kësaj periudhe!
Diskutimet mbi organizimin e punës së SK Vllaznia dhe problemet e ngritura nga unë në Drejtorinë e Kulturës, Rinisë dhe Sportit janë pjesë e punës time të përditshme, diskutime këto që kan vend vetëm në strukturat përkatëse. Është e drejtë e strukturave të Bashkisë Shkodër të marrë vendime pavarsisht se mund të jenë me një këndvështrim dhe objektiv të ndryshëm nga ato të Z. Artan Kalaja.
Me respekt
Mark Kroqi