Menjëherë sapo drejtorja e departamentit të bio-kimisë Ditika Kopliku është shfaqur duke marrë 100 euro për të kaluar një student në videon e emisionit investigative “Stop” kanë nisur që të merren edhe masat ndaj saj.
Drejtuesit e universitetit “Luigj Gurakuqi” kanë urdhëruar një mbledhje të departamentit. Pas kësaj mbledhje fillimisht është vendosur që pedagogia Kopliku të pezullohet nga detyra. Ky vendim ka qenë unanim dhe i padiskutueshëm. Pas këtij vendimi do të ketë një tjetër mbledhje, këtë radhë nga Këshilli i Etikës i cili ka në dorë që të marrë dy vendime. Etika ose vendos për ta përjashtuar apo për ta lënë në detyrë. Cilido që të jetë vendimi i Këshillit të Etikës në fund do të jetë senati ai që do vendos nëse pedagogia Kopliku duhet që të largohet apo jo nga posti që mban në universitetin e Shkodrës. Për të ndjekur të gjitha këto hapa natyrisht që do të duhet një kohë e caktuar. Policia ka shpallur në kërkim 46 vjeçaren Didika Kopliku për rastin në fjalë. Universiteti i Shkodrës do të ndjekë edhe vendimin e gjykatës. Videot ku pedagogët marrin para për të dhënë një provim po kthehen në një shqetësim teksa universiteti i Tiranës dhe Shkodrës të paktën nga rastet e publikuara janë më të prekurit nga ky fenomen. Kjo bën që shumë studentë të mos kenë më shumë besim tek universitetet shtetërore duke preferuar në sasi të konsiderueshme universitetet private.
