Një polic australian është qëlluar për vdekje në një pronë rurale në Tasmaninë e Australiës. Polici po kryente “detyra rutinë” në një shtëpi në North Motton, pranë qytetit Ulverstone, të hënën në mëngjes, kur u qëllua nga “një anëtar i publikut,” tha Policia e Tasmanisë në një deklaratë.
Një polic i dytë ka kundërpërgjigjur me zjarr, duke plagosur të dyshuarin, i cili më pas është dorëzuar. I dyshuari nuk është plagosur rëndë, por polici ka ndërruar jetë në vendngjarje si pasojë e plagëve të marra. Qëllimet me armë janë relativisht të rralla në Australi, e cila ka vendosur disa nga rregulloret më të rrepta për armët e zjarrit në botë, pas vrasjes masive të 35 personave nga një person i vetëm në Port Arthur, Tasmani, në vitin 1996.
Pas qëllimit të së hënës, në North Motton është vendosur një skenë krimi, tha një zëdhënës i policisë, duke shtuar se “nuk ka kërcënim të vazhdueshëm për publikun.” “Kjo është një ngjarje traumatike dhe po ofrohet mbështetje për mirëqenien e të përfshirëve dhe të prekurve,” thuhej në deklaratë.
Policia pritet të japë një përditësim për mediat të hënën pasdite. Në një deklaratë, kryeministri i Tasmanisë, Jeremy Rockliff, e quajti ngjarjen një “tragjedi të dhembshme.” “Për të gjithë ata që patën nderin të njihnin këtë polic, veçanërisht familjen dhe kolegët e tij… dashuria e një shteti të tërë është me ju sot.”
