Policia ka reaguar në lidhje me dhunën në protestën e opozitës paraditen e sotme. Në një njoftim zyrtar, policia jep informacione për efektivët e plagosur, por jo për qytetarët e lënduar.

“Gjatë protestës së sotme të opozitës të zhvilluar para Kuvendit të Shqipërisë janë lënduar dhe kanë marrë ndihmë mjekesore 6 punonjës policie, konkretisht: O.M, V.T dhe M.A, efektiv policie te Forca e Posaçme ‘Shqiponja’. N.K, E.X dhe D.B, efektivë policie të Komisariatit të Policisë nr 1, nga të cilët dy prej tyre femra. Policia e Shtetit në bashkëpunim me Prokurorinë e Rrethit Gjyqësor Tiranë po vijon verifikimet për identifikimin e gjithë personave, të cilët kanë ushtruar dhunë gjatë protestës”, thuhet në një njoftim zyrtar të Policia.

Ditën e sotme u shënuar përplasje mes efektivëve të policisë dhe protestuesve dhe mes këtyre të fundit u shënuar disa të lënduar. Fotografia e një qytetari të gjakosur qarkulloi në media paraditen e sotme. Edhe deputetja e LSI-së Floida Kërpaçi u pa me duar të gjakosura. Ajo denoncoi publikisht dhunën e ushtruar nga policia ndaj saj dhe protestuesve të tjerë.