Vllaznia po përgatitet për përballjen e rradhës në kampionat ndaj Dinamos, një sfidë kjo që konsiderohet vendimtare për të ardhmen e objektivave të skuadrës shkodrane. Në prag të këtij takimi, mbrojtësi Erdenis Gurishta ka dalë para mediave, teksa ai e nisi konferencën për shtyp me një urim për të gjithë besimtarët myslimanë me rastin e festës së Fitër Bajramit. Ndërkohë, zv/kapiteni i Vllaznisë theksoi rëndësinë e ndeshjes, duke e vlerësuar maksimalisht Dinamon. Gurishta, i cili rikthehet në fushën e blertë pas mungesës prej disa javësh, u shpreh i qartë për objektivin e ekipit, teksa tha se fitorja është e vetmja alternativë.
Në fjalët e tij, Gurishta tha se Vllaznia ka ekipin më të mirë në Shqipëri, pavarësisht se ndoshta shumëkush nuk e pranon.
Takimi ndaj Dinamos, i cili do të luhet pasditën e së shtunës në orën 18:00 në stadiumin “Loro Boriçi” pritet me interes, teksa Vllaznia synon të shfrytëzojë faktorin fushë për të marrë një rezultat pozitiv dhe për të vijuar garën për objektivat sezonalë.
