Prokuroria e Përgjithshme ka reaguar ndaj deklarata të kryeministrit Rama sot paradite në grupin parlamentar të PS-së ku u mor vendimi për të votuar kundër arrestimit të deputetit Saimir Tahiri. Rama tha se prokuroria kishte ardhur me “fletë bakalli” për të kërkuar arrestimin e deputetit dhe madje ngriti disa pyetje retorike të cilat hedhin aludime se prokuroria po përdoret politikisht nga opozita. Në përgjigje Prokuroria deklaroi se Rama nuk mund ta intimidojë aktivitetin e saj hetimor.
“Prokuroria për Krime të Rënda rithekson qëndrimin e saj se deklaratat politike nuk e kanë intimiduar dhe nuk mund ta intimidojnë aktivitetin e saj hetimor. Prokuroria për Krime të Rënda e ka të qartë se, që në fillimet e këtij hetimi, do të përballej me goditje frontale politike, për shkak se person nën hetim është ish-ministri i Brendshëm dhe aktualisht deputet i Parlamentit të Shqipërisë. “Por, kjo nuk e pengoi aspak që t’i drejtohej Kuvendit të Shqipërisë me kërkesë për autorizimin për arrestimin e personit nën hetim.
Pasi, në vlerësimin e prokurorëve të çështjes, ekzistojnë kushtet dhe rrethanat ligjore, për të cilat është e nevojshme të merren masat që parashikon Kodi i Procedurës Penale për rastet e veprave të rënda, si ato të “Trafikut të narkotikëve”, kryer në bashkëpunim, në formën e posaçme të grupit të strukturuar kriminal, si edhe “Korrupsionit pasiv të zyrtarëve të lartë….”.” thuhet në deklaratën e prokurorisë së Krimeve të Rënda. Prokuroria e Krimeve të Rënda thotë se Rama mori rolin e gjykatësit kur dha vlerësimin e provave që ajo i dorëzoi në Komisionin e Mandateve për të kërkuar autorizimin e arrestimit të Tahirit. Rama i quajti “Fletë bakalli” dhe prokuroria reagon:
“Gjithçka çfarë u deklarua publikisht nga Kryeministri i Shqipërisë z. Edi Rama, paraditen e së Hënës (dt. 23.10.2017) shkon në të kundërt të asaj që është deklaruar për dy vite me radhë-Reformën në Sistemin e Drejtësisë. Në fjalën e tij, kryeministri, në cilësinë e Kryetarit të subjektit politik që ai drejton, shprehu opinionin dhe vlerësimin mbi provat e paraqitura në mënyrë sekrete nga ana e Prokurorisë për Krime të Rënda në Këshillin e Mandave dhe Imuniteteve në Parlamentin e Shqipërisë. Pra, në mënyrë publike, Kryeministri mori rolin e gjykatës, një atribut që nuk i takon as me Kushtetutë dhe as me ligj. Në vlerësimin tonë, ky qëndrim publik i Kryeministrit është sinjal i qartë që lufta kundër korrupsionit në nivele të larta, qëllimi i të cilës ishte edhe miratimi i Reformës në Drejtësi, do të kontrollohet nga politika. Ne Kroaci u arrestua kryeministri Prokuroria i referohet dhe rastit të Kroacisë ku hetimet çuan në dënimin e ish kryeministrit, Ivo Sanader . Në prill të 2017 sh-kryeministri i Kroacisë dhe ish-kryetari i HDZ-së, Ivo Sanader u dënua me katër vjet e gjysmë heqje lirie.
“Prokuroria për Krime të Rënda ka pasur kënaqësinë, disa kohë më parë, të dëgjojë përvojën e homologëve të saj në Kroaci, hetimet e të cilëve, të nisura për një orë dore, përfunduan me arrestimin e, më tej, me dënimin e ish-kryeministrit të atij vendi. Gjithashtu, përvoja të ngjashme të suksesshme ka pasur edhe në vende, si Rumania e të tjerë. Prokuroria për Krime të Rënda është e bindur se i gjithë faktori politik shqiptar, i mbështetur edhe nga partnerët më të rëndësishëm ndërkombëtarë, hartuan Reformën në Drejtësi, duke pasur si guidë të suksesshme përvojën kroate e rumune, të cilat i ndihmuan për t’u integruar në Bashkimin Europian.” Paralajmerimi i prokurorise Prokuroria paralajmeron se nese do te kete nderhyrje flagrante te politikes atehere reforma ne drejtesi nuk do te kete sukses
“Nëse hetimet e Prokurorisë do të shoqërohen me ndërhyrje flagrante të politikës, atëherë qëllimi i Reformës në Drejtësi për luftën kundër korrupsionit dhe pandëshkueshmërisë në nivele të larta, do të jetë një sfidë e cila nuk do të përballohet me sukses. Gjithësesi, Prokuroria për Krime të Rënda po vijon hetimet e saj, si për rastin konkret, ashtu edhe për çështje të tjera të krimit të organizuar dhe grupeve të strukturuara kriminale. Deklaratat politike dhe, sidomos presionet indirekte me procesin e Vetingut, nuk mund dhe nuk do të mund të cënojnë proceset hetimore.” Vetëm 30 minuta më pas erdhi reagimi i Kryeministrit Edi Rama i cili shprehu keqardhjen që Prokuroria e Krimeve të Rënda, është shprehur në media menjëherë pas fjalës së tij përpara grupit socialist, lidhur me kërkesën për hetim të deputetit Saimir Tahiri.
