Një protestë paqësore është zhvilluar ditën e djeshme në qytetin e Durrësit, në kuadër të mbrojtjes së të drejtave të njeriut dhe të emigrantëve. Shoqata shqiptare “Shpëtimi Nexhat” organizoi këtë manifestim me pjesëmarrjen e dhjetëra qytetarëve dhe zonjave shqiptare, të cilat ngritën zërin për mbrojtjen e të drejtave themelore të njeriut.
Gjatë tubimit u theksua rëndësia e respektimit të lirive individuale dhe u përçua një mesazh solidariteti me të gjithë emigrantët që kanë gjetur strehë në Shqipëri. Organizatorët falënderuan shtetin shqiptar për përkushtimin dhe punën e palodhur në mbështetje të emigrantëve, duke e cilësuar Shqipërinë si një “shtëpi të madhe për të gjithë”.
Protestuesit shprehën gjithashtu shqetësimin e tyre për situatën e disa anëtarëve të organizatës MEK, të cilët, sipas deklaratave, ndodhen të izoluar në kampe dhe nuk kanë mundësi të komunikojnë me familjet e tyre në vendin e origjinës. U kërkua transparencë dhe mbrojtje më e madhe për të drejtat e tyre, duke nënvizuar nevojën për trajtim human dhe respektim të plotë të lirive personale.
Protesta kaloi në mënyrë të qetë dhe u mirëprit nga qytetarët, duke dëshmuar edhe një herë angazhimin qytetar për një shoqëri më të drejtë dhe më të hapur.
