Ekspozita “Pazari i humbur i Shkodrës: Ringjallja e një Kujtese” po i afrohet mbylljes, duke përmbyllur një cikël prezantimesh që sollën në qendër trashëgiminë tekstile të qytetit. Mes zërave të përfshirë në këtë udhëtim kulturor ishte edhe dizajneri i tekstileve Jozef Martini, i cili në një bisedë të zhvilluar në Muzeun e Fotografisë “Marubi” ndau reflektime mbi misionin e tij krijues.
Martini theksoi se në qendër të praktikës së tij qëndron dëshira për të përkthyer kulturën tradicionale shkodrane në një gjuhë bashkëkohore vizuale. Ai solli në kujtesë traditën mbi një shekull të Shkodrës në përpunimin e tekstileve, duke e konsideruar këtë trashëgimi si një pasuri që jo vetëm frymëzon artin sot, por shërben edhe si urë dialogu kulturor ndër breza.
Ekspozita, e cila ka zgjuar interes të gjerë gjatë gjithë periudhës së saj, po mbyllet si një ngjarje e rëndësishme e kujtesës kulturore, duke ndërlidhur historinë me artin bashkëkohor.
