
JETOJNË TË BRAKTISURN NË PERIFERI TË QYTETIT PA ASNJË MBËSHTETJE. Të braktisur në një cep të qytetit të Shkodrës, mes një varfërie ekstreme, jetojnë familjet e komunitetit rom. Të ndodhur aty prej vitesh, nuk kanë asnjë mbështetje. Të vetmuar e të nepërkëmbur mbijetojnë mes shumë vështirësive. Papunësia e mungesa e një strehe janë problemet kryesore për ta.
Sot duhej të ishte festë sepse 8 prilli është dita e tyre, dita ndërkombëtare e romëve por nuk mund të jetë kështu kur nuk sigurojnë as bukën e gojës. Pjesa më e madhe e tyre, siç thonë edhe vetë kanë një mision të vetëm, të lypin. Bien ngado rrugëve të Shkodrës duke kërkuar lëmoshë. Jetesa për ta është shumë e vështirë. Po të ishte për Bashkinë e Shkodrës apo Qeveritë, romët nuk do të kishin arritur të mbijetojnë. Të gjithë jemi dëshmitarë të imazheve rrënqethëse kur herë pas here gërmojnë në kazanët e mbeturinave për ndonjë kafshatë buke. Edhe ata pak vetë që punojnë, bëjnë punët më të rënda në qytet e paga që marrin është qesharake. Zyrtarët e kollarisur vrapojnë për aktivitete pafund e projekte të njëpasnjëshme që nuk rezultojnë të prekshme sepse romët vijojnë të jenë të braktisur pa asnjë mbështetje.