Uashingtoni do të ketë kontakte me rusët të mërkurën, pas negociatave të djeshme në Jeddah me ukrainasit sipas asaj që pohoi Marco Rubio , i cili theksoi se ka pasur kontakte në nivele të ndryshme me homologët rusë, anëtarë të ndryshëm të qeverisë. Sekretari amerikan i Shtetit tha se do të kishte “pika të shumta kontakti” me rusët, por nuk u fut në detaje të mëtejshme për këtë. Ai gjithashtu nuk dha konfirmim apo detaje rreth udhëtimit të pritshëm të të dërguarit të posaçëm Steve Witkoff në Rusi.
“Për sa i përket reagimit rus ndaj kësaj, kjo është pyetja që na shqetëson,” u tha Rubio gazetarëve gjatë një ndalese karburanti në Irlandë dhe rrugës për në Kanada për takimin e ministrave të jashtëm të G7.
Kryediplomati amerikan vlerësoi se Moska “ndoshta po e përpunon” lajmin për propozimin e përkohshëm të armëpushimit ashtu si pjesa tjetër e botës. Moska nuk pranoi të komentojë nëse propozimi i armëpushimit i rënë dakord nga Shtetet e Bashkuara dhe Ukraina të martën është i pranueshëm për Rusinë, me zëdhënësin e Kremlinit, Dmitry Peskov duke thënë se Moska pret të informohet së pari nga zyrtarët amerikanë të përfshirë në bisedime. Sipas Rubios Ukraina është e gatshme të ndalojë të gjitha aktivitetet në fushën e betejës dhe të fillojë procesin e menjëhershëm të negociatave për një fund të qëndrueshëm të luftës.
“Nëse përgjigja e tyre është po, atëherë ne e dimë se kemi bërë përparim të vërtetë dhe ekziston një mundësi reale për paqe. Nëse përgjigja e tyre është negative, do të jetë jashtëzakonisht për të ardhur keq dhe më pas qëllimet e tyre do të bëhen të qarta”. përfundoi ai
