Kriza energjetike në Kosovë duket se nuk do të marrë fund për një kohë të gjatë. Pas stabilizimit të përkohshëm me furnizim, pas mesnatës së sotme, saktësisht në orën 24:00, do të nxirret nga funksioni edhe blloku A3 i Termocentralit “Kosova A”.
Mediat në Kosovë kanë mësuar se me ndaljen e punës së këtij blloku, Termocentrali “Kosova A” nuk do ta ketë në funksion asnjë njësi.
Vetë Korporata Energjetike e Kosovës ka njoftuar se po planifikon ta ndalë për 4-5 ditë njësinë A-3.
Përmes një postimi në faqen zyrtare, KEK ka thënë se ka ndërmarr të gjitha masat e nevojshme për mbulimin e mungesave të planifikuara dhe se nuk pritet të ketë reduktime të energjisë elektrike.
“Korporata Energjetike e Kosovës njofton se njësia A-3 është në punë por planifikohet për ndalje 4-5 ditore. Lidhur me këtë, KEK ka ndërmarr të gjitha masat e nevojshme për mbulimin e mungesave të planifikuara, kështu që nuk pritet të ketë reduktime të energjisë elektrike”, thuhet në njoftim.
