Një ngjarje e rëndë ka ndodhur mëngjesin e sotëm në njësinë Guri Zi në Shkodër. Një shtetas 61 vjeç H.S është arrestuar nga policia e Shkodrës pasi ka futur nën makinë një komshie të tij, shtetasen K.H 54 vjeçe. 54 vjeçarja ka marrë fraktura të rënda në këmbë kryesisht por edhe pjesë të tjera të trupit dhe është dërguar menjëherë drejt spitalit të traumës për mjekim të specializuar ndërsa ndodhet jashtë rrezikut për jetën.
Policia e ka gjetur 54 vjeçaren nën gomat e makinës të H.S rreth orës 7:30 të mëngjesit të sotëm. Sipas burimeve dyshohet se 61 vjeçari H.S përpara se ta godiste dha ta vendoste nën rrotat e makinës, e ka rrahur 54 vjeçaren K.H dhe pas dhunës fizike më pas e ka zënë me makinën e tij. Pas kësaj ngjarje ka mbërritur policia duke bërë të mundur fillimisht nxjerrjen nga poshtë makinës të K.H dhe më pas arrestimin e 61 vjeçarit H.S.
Gruaja po shkonte në kishën e fshatit në mëngjes kur papritur komshiu i saj dyshohet se i ka dalë para e ka rrahur dhe më pas e ka vënë nën gomat e makinës. Sipas burimeve nga vendngjarja K.H dhe H.S i kanë banesat shumë afër në lagjen Kërtollaj të njësisë Guri Zi. Po sipas të njëjtave burime palët kanë një konflikt të mëparshëm mes tyre. Bashkëshorti i K.H dhe H.S janë ngatërruar edhe më përpara, konflikt i cili ka vijuar deri më tani.
54 vjeçarja ka treguar ngjarjen e rëndë për policinë se fillimisht H.S e ka goditur dhe më pas e ka zënë me makinë. 61 vjeçari ka bërë një deklarim të kundërt duke thënë se ka qenë 54 vjeçarja K.H që i ka dalë para me një levë hekuri për ta vrarë dhe në atë moment nga frika e kam zënë me makinë.
Policia vijon hetimin për zbardhjen e plotë të këtij konflikti mes komshinjve që përpak u kthye në një tragjedi të rëndë.
