Ministria për Evropën dhe Punët e Jashtme ka reaguar zyrtarisht lidhur me zhvillimet e fundit të situatës së sigurisë në Izrael, duke deklaruar se po ndjek me prioritet dhe vëmendje të veçantë gjendjen e shtetasve shqiptarë që ndodhen atje.
Sipas njoftimit zyrtar, deri më tani nuk ka raportime për shtetas shqiptarë të lënduar apo të dëmtuar si pasojë e përshkallëzimit të dhunës në rajon.
Aktualisht, janë evidentuar pesë shtetas shqiptarë në Izrael: tre me status turisti dhe dy me qëndrim të përkohshëm. Ambasada Shqiptare në Tel Aviv është në kontakt të drejtpërdrejtë dhe të vazhdueshëm me ta.
“Të gjithë ndodhen në gjendje të mirë shëndetësore, janë të informuar dhe po ndjekin udhëzimet e sigurisë të autoriteteve izraelite”, thuhet në deklaratë.
