Targat e vendosura në automjetin e përdorur në atentatin ndaj Prokurorit Arjan Ndoj janë vjedhur një javë më parë në Tiranë.
Shoferja kishte bërë denoncimin në polici por efektivët nuk ranë në gjurmët e hajdutëve. Ndërkohë provat e gjetura në këtë automjet konsiderohen tepër e rëndësishme për hetimin, dhe po analizohen në laboratorin e policisë shkencore.
Policia ka shoqëruar deri tani mbi 40 persona për ti pyetur për ngjarjen, ndërsa gjendje shëndetësore e 3 të plagosurve është më e stabilizuar.
Targat AA 342 LM të cilat u vendosën në makinën e përdorur në atentatit ndaj prokurorit Arjan Ndoja janë denoncuar të vjedhura në Tiranë, rreth një javë më parë. Targat i përkasin një veture ‘Nissan’ në pronësi të shtetases me inicialet V.Gj. e cila është marrë në pyetje nga policia.
E reja teksa do përdorte automjetin e saj ka konstatuar mungesën e targave dhe për këtë ajo ka bërë denoncimin tek komisariati nr.1.
Policia ka nisur hetimet por denoncimi i saj nuk ka mundur të çojë në gjurmët e hajdutëve. Në brendësi të automjetit të autorëve u gjetën dy maska koke, dy automatik kallashnikov, dhe një shishe benzinë. Gjithashtu nga grupi hetimor është identifikuar dhe një automjet tip ‘Skoda’ që ka ndaluar pas atentatit dhe për këtë arsye po verifikohet nëse ka lidhje me autorët.
Provat e gjetura konsiderohen tepër e rëndësishme për hetimin, dhe po analizohen në laboratorin e policisë shkencore. Ndërkohë policia me urdhër të prokurorisë ka shoqëruar mbi 40 persona të cilët janë pyetur për ngjarjen, e më pas janë lënë të lirë.
Prokurori i Durrësit Arjan Ndoja dhe Aleksandër Laho, qëndrojnë në spitalin e Durrësit që prej pasdites të së premtes.
Fraktura që prokurori Ndoja ka pësuar në shpatull sipas mjekëve kërkon ende kujdesin e tyre, duke u mbajtur në terapi intensive në pavijonin e Ortopedisë. Ndërsa Aleksandër Laho qëndron në pavijonin e kirurgjisë pasi nga plumbi i marrë i ka shkaktuar dëmtime të nofullës.
Ndërkohë dy ditë pas ngjarjes në të cilën, drejtori i përgjithshëm i Policisë së Shtetit, Ardi Veliu, ka mbledhur në Drejtorinë e policisë Tiranë strukturat drejtuese dhe grupin hetimor.
Veliu ka kërkuar informacion në lidhje me ecurinë e punës për zbardhjen e të gjitha provave në dy automjetet e ngjarjes në fjalë dhe punën për identifikimin e autorëve të ngjarjes.
Puna për identifikimin e autorëve po vijon nga prokurorët Anton Martini dhe Besim Hajdarmataj, në sinkron me Policinë e Shtetit.
