Pas 45 vitesh kontribut në shërbimin shëndetësor, mjeku i njohur lezhjan Tonin Frroku ka përmbyllur angazhimin e tij shtetëror në fushën e mjekësisë. Me këtë rast u organizua një aktivitet i veçantë, ku morën pjesë kolegë, bashkëpunëtorë dhe personalitete të njohura të mjekësisë shqiptare.Në shenjë vlerësimi për kontributin e dhënë ndër vite, Këshilli Kombëtar i Urdhrit të Mjekut të Shqipërisë i akordoi doktor Tonin Frroku një Certifikatë Mirënjohjeje.
Gjatë ceremonisë, kolegët e tij vlerësuan profesionalizmin, përkushtimin dhe kontributin e doktor Frrokut në shërbim të pacientëve dhe zhvillimin e mjekësisë ne Lezhe dhe me gjere.
Në fjalën e tij, doktor Tonin Frroku u shpreh mirënjohës për vlerësimin dhe bashkëpunimin e kolegëve gjatë gjithë karrierës së tij.
Tonin Frroku e nisi punën në shërbimin shëndetësor në vitin 1980, në vendlindjen e tij, Ungrej të Lezhës, fillimisht si infermier. Pas përfundimit të Fakultetit të Mjekësisë në vitin 1986, ai shërbeu si mjek në Pukë dhe në disa fshatra të Lezhës. Më pas u specializua në degën e gastrohepatologjisë dhe u emërua në Spitalin Rajonal të Lezhës, ku përmbylli edhe karrierën e tij shtetërore, duke lënë pas një kontribut të çmuar në shërbim të shëndetit të qytetarëve.
